Kortavefur Hafnarfjarðar

Lýsing

Á miðlægu og opnu svæði kortavefs er hægt að sækja hafsjó af upplýsingum varðandi skipulagsmál, teikningar, starfsemi og þjónustu bæjarins. Þar má nálgast alla uppdrætti byggingarfulltrúa sem eru skannaðir og skráðir jafnóðum og þeir hafa verið samþykktir og þannig eru bæði sér- og aðaluppdrættir gerðir aðgengilegir með rafrænum hætti. Kortavefurinn er uppfærður daglega og tekur ætíð mið af nýjustu upplýsingum.

Sigurjón Ólafsson, sviðsstjóri hjá Hafnarfjarðarbæ skrifar:

Lengi vel var ég hálf hræddur við kortasjár. Leið eins og ég þyrfti að vera verkfræðingur til að geta notað þetta, gæti mögulega skemmt eitthvað, eytt út lagnateikningum eða þaðan af verra. Þegar ég kom til starfa hjá Hafnarfjarðarbæ varð mér ljóst að þetta verkfæri væri lygilega vinsælt og því mikilvægt að hlúa vel að því. En lausnin sem við vorum með var ekki beinlínis notendavæn og býsna takmörkuð. Þannig að við skiptum um þjónustaðila og höfum í samstarfi við Loftmyndir unnið að stöðugum endurbótum í framsetningu og aukinni upplýsingagjöf til íbúa.

Kortavefurinn, eins og við kjósum að nefna lausnina, á núna fullt erindi til almennings. Til að koma því á framfæri létum við gera myndband sem sýnir glöggt hvað þetta er gagnlegt verkfæri í þjónustu við íbúa og vonumst til að auka enn frekar notkunina. Jökulá vann handritsgerð með okkur, hannaði með hliðsjón af okkar nýja hönnunarkerfi (meira um það fljótlega) og framleiddi þessa fínu afurð.