Eitt af sameiginlegum verkefnum sveitarfélaganna í stafrænni umbreytingu árið 2022 var að greina núverandi stöðu m.t.t. Microsoft hugbúnaðarleyfa, samninga vegna skjala- og málakerfa sveitarfélaga, stöðu rafrænnar skila á gögnum auk þess hvað megi bæta til framtíðar.
KPMG aðstoðaði Samband íslenskra sveitarfélaga við verkferlið allt frá greiningu, stýringu vinnufunda yfir í samantekt og kynningar niðurstaðna, ásamt því að gera viðeigandi gagnasöfnun, greiningar og úrvinnslu fyrir allt verkefnið. Stærsti hluti vinnunnar var gagnasöfnun, greiningar ásamt úrvinnslu og kynningu á niðurstöðu.
Samhliða greiningu skrifstofuhugbúnaðarleyfa er framkvæmd greining á núverandi kröfum sveitarfélaga til skjalavörslu og málakerfis. Er það gert m.t.t. samþættingar við aðrar skrifstofuhugbúnaðarlausnir frá Microsoft og hæfni þeirra til að mæta kröfum um rafræn skil Þjóðskjalasafns.
